«Խազեր» հայկական երաժշտական մրցանակաբաշխություն 2025
2025 թվականի ապրիլի 30-ին Կարեն Դեմիրճյանի անվան մարզահամերգային համալիրում կայացավ անդրանիկ «Խազեր» հայկական երաժշտական մրցանակաբաշխությունը, որը նոր էջ բացեց հայկական երգարվեստի պատմության մեջ:
Երեկոն լի էր վառ և անկրկնելի էմոցիաներով:
«Խազեր» մրցանակաբաշխությունը համախմբեց հայաստանյան և սփյուռքի երաժշտական համայնքի շուրջ 400 ներկայացուցիչների՝ հայ արտիստների, հեղինակների, կատարողների, ստեղծագործողների, պրոդյուսերների, ռեժիսորների, երաժիշտների, ոճաբանների, արվեստագետների, մեդիա մասնագետների և հանրահայտ մշակութային դեմքերի։
«Խազեր» մրցանակաբաշխության հատուկ հյուրն ամերիկացի կոմպոզիտոր, պրոդյուսեր և «Գրեմմի» կրկնակի մրցանակակիր և Ամերիկյան ձայնագրման ակադեմիայի Տեխասի մասնաճյուղի ղեկավար Kitt Wakeley-ն էր, ով համարվում է ժամանակակից սիմֆոնիկ ռոքի և սինթ-էլեկտրոնիկ երաժշտության միջազգային ճանաչում ունեցող առաջատար ներկայացուցիչներից մեկը։
«Բեգրաունդ Փրոդաքշն» ընկերությունը հանդես եկավ որպես միջոցառման կազմակերպիչ` պատասխանատու լինելով մրցանակաբաշխության ստեղծագործական հայեցակարգի մշակման, արտադրական գործընթացների, կարմիր գորգի արարողության, բեմադրական լուծումների, կազմակերպչական այլ բաղադրիչների և միջոցառման ամբողջական իրագործման համար։
